ایران کے صوبے خراسان میں کوئلے کی کان میں دھماکا ہوا ہے جس کے نتیجے میں جاں بحق افراد کی تعداد 51 ہوگئی ہے
ایرانی میڈیا کے مطابق یہ واقعہ آج جنوبی صوبے خراسان میں پیش آیا ہے۔ کوئلے کی کان میں دھماکے کے وقت کام میں درجنوں افراد موجود تھے جن میں سے ابتدائی طور پر 30 افراد کے جاں بحق ہونے کی تصدیق ہوئی تھی تاہم وقت گزرنے کے ساتھ مرنے والوں کی تعداد میں اضافہ ہو رہا ہے۔
غیر ملکی میڈیا نے بتایا ہے کہ کوئلے کی کان دھماکے میں جاں بحق افراد کی تعداد 51 ہوگئی ہے جب کہ اب بھی کئی افراد کان میں پھنسے ہوئے ہیں۔
ایران کے سرکاری ٹی وی کے مطابق مدانجو کمپنی کے بلاک بی اور سی میں اتوار کی صبح 9 بجے گیس دھماکا ہوا جو بڑے جانی نقصان کا سبب بنا۔
دھماکے کی اطلاع ملتے ہی انتظامیہ، سیکیورٹی اور ریسکیو ادارے جائے حادثہ پر پہنچ گئے تھےاور فوری طور پر ہنگامی امدادی سرگرمیاں شروع کرتے ہوئے لاشوں اور زخمیوں کو نکالنے کا کام شروع کر دیا جو اب تک جاری ہے
لاشوں اور زخمیوں کو اسپتال منتقل کیا جا رہا ہے جب کہ ریسکیو حکام کے مطابق اموات کی تعداد میں اضافہ ہو سکتا ہے۔
اقوام متحدہ کی جنرل اسمبلی کے لیے نیویارک جاتے ہوئے ایران کے صدر مسعود پیزشکیان نے کہا کہ انہوں نے حکم دیا ہے کہ پھنسے ہوئے افراد کو بچانے اور ان کے اہل خانہ کی مدد کے لیے تمام کوششیں کی جائیں۔ انہوں نے یہ بھی کہا کہ واقعے کی تحقیقات شروع کر دی گئی ہیں۔
ایران میں کان دھماکے میں یہ واقعہ ہلاکتوں کی تعداد کے حوالے سے اب تک سب سے ہولناک واقعہ بتایا جا رہا ہے اس سے قبل 2013 میں کان کنی کے دو الگ الگ واقعات میں 11 کان کن مارے گئے تھے۔ 2009 میں متعدد واقعات میں 20 مزدور مارے گئے جب کہ 2017 میں کوئلے کی کان میں دھماکے سے کم از کم 42 افراد اپنی جانوں سے ہاتھ دھو بیٹھے تھے۔
کوئی تبصرے نہیں:
ایک تبصرہ شائع کریں