لاپتہ خاتون کی لاش اژدھے کے پیٹ سے برآمد

 انڈونیشیا میں ایک عظیم الجثہ اژدھے میں کسی انسان کی موجودگی کے شک میں جب پیٹ چاک کیا گیا تو اس میں سے لاپتہ خاتون کی لاش ملی۔

غیر ملکی میڈیا کے مطابق اژدھے سے برآمد ہونے والی لاش کی شناخت 48 سالہ فریدہ کے نام سے ہوئی جو بازار میں کھانے پینے کی اشیا فروخت کرکے گھر کے اخراجات میں اپنے شوہر کا ہاتھ بٹاتی تھی۔3 روز قبل فریدہ کھانے پینے کی اشیا کی فروخت کے لیے اپنے گاؤں جو ایک جنگل کے قریب واقع ہے، سے بازار گئی تھی لیکن نہ تو وہ مارکیٹ پہنچی اور نہ ہی واپس گھر لوٹی۔

شوہر نے تھانے میں رپورٹ درج کرائی اور اہل محلہ کے ساتھ اہلیہ کو ڈھونڈنے لگا لیکن فریدہ کا کوئی سراغ نہ مل سکا۔دو روز بعد گاؤں والوں کو ایک اژدھا نظر آیا جس کا پیٹ معمول سے زیادہ پھولا ہوا تھا۔ فریدہ کے شوہر اور اہل خانہ کو شک ہوا کہ شاید اژدھے نے نگل لیا ہو۔

گاؤں والوں کی مدد سے اژدھے کو پکڑ کو اس کا پیٹ چاک کیا گیا تو سب سے پہلے فریدہ کا سر نظر آیا۔ اژدھے کے پیٹ سے فریدہ کو مردہ حالت میں نکال کر اس کی تدفین کردی گئی۔علاقہ مکینوں کا کہنا ہے کہ اژدھے نے پہلے فریدہ کو پاؤں پر ڈسا اور جب وہ گر گئی تو اس سے لپیٹ کر اپنے شکنجے میں جکڑ لیا۔ جس سے خاتون کا دم گھٹ گیا اور وہ مر گئی۔بعد ازاں اژدھے نے خاتون کو مکمل طور پر نگل لیا۔